KUWAITVARTHAKAL

സർവീസിൽനിന്ന് വിരമിച്ചവരുടെയും വയോജനങ്ങളുടെയും ആരോഗ്യ സുരക്ഷ ഉറപ്പുവരുത്തുന്നതിനായി ഒരു അത്യാധുനിക മെഡിക്കൽ സിറ്റി വികസിപ്പിക്കാനുള്ള നടപടികളുമായി കുവൈറ്റ്. 243 ദശലക്ഷം കുവൈറ്റ് ദിനാർ അഥവാ 79 കോടി ഡോളർ ചെലവ് വരുമെന്നു പ്രതീക്ഷിക്കുന്ന ഈ പദ്ധതിയുടെ പ്രാഥമിക പ്രവർത്തനങ്ങൾ ഇതിനകം തുടങ്ങിക്കഴിഞ്ഞു.പബ്ലിക് ഇൻസ്റ്റിറ്റ്യൂഷൻ ഫോർ സോഷ്യൽ സെക്യൂരിറ്റി (പിഐഎഫ്എസ്എസ്) യുടെ നേതൃത്വത്തിലാണ് മെഡിക്കൽ സിറ്റി വികസിപ്പിക്കുന്നത്. രാജ്യത്തെ പ്രായമാകുന്ന ജനങ്ങൾക്ക് മികച്ചതും അത്യാധുനികവുമായ ആരോഗ്യ സേവനങ്ങൾ ലഭ്യമാക്കുന്നതിനായി അന്താരാഷ്ട്ര മെഡിക്കൽ സ്ഥാപനങ്ങളുമായി സഹകരിച്ചാണ് മെഡിക്കൽ സിറ്റി ആരംഭിക്കുക. പദ്ധതിക്കായി സ്വകാര്യ മേഖലയുടെ പങ്കാളിത്തം ഉപയോഗപ്പെടുത്താനാണ് ലക്ഷ്യമിടുന്നതെന്ന് പിഐഎഫ്എസ്എസ് അധികൃതർ അറിയിച്ചു.860,000 ചതുരശ്ര മീറ്റർ സ്ഥലത്ത് ജഹ്റയിലെ അംഗാറ പ്രദേശത്ത് നിർമിക്കാൻ രൂപകൽപന്ന ചെയ്തിരിക്കുന്ന കുവൈറ്റ് മെഡിക്കൽ സിറ്റി, നൂതന വൈദ്യചികിത്സ, ദീർഘകാല പരിചരണം, പുനരധിവാസ സേവനങ്ങൾ എന്നിവ വാഗ്ദാനം ചെയ്യുന്ന ഒരു പ്രധാന ആരോഗ്യ സംരക്ഷണ കേന്ദ്രമായാണ് വിഭാവന ചെയ്‌തിരിക്കുന്നത്.പദ്ധതിക്കായി 132 കെവി പവർ സ്റ്റേഷന്റെ പൂർത്തീകരണം ഉൾപ്പെടെയുള്ള പ്രധാന നാഴികക്കല്ലുകൾ ഇതിനകം പൂർത്തീകരിച്ചതായി അധികൃതരെ ഉദ്ധരിച്ച് അൽ ഖബസ് പത്രം റിപ്പോർട്ട് ചെയ്തു. പദ്ധതി നിർമാണം പൂർത്തിയാക്കി വൈദ്യുതി, ജലം, പുനരുപയോഗ ഊർജ മന്ത്രാലയത്തിന് കൈമാറി. അടിസ്ഥാന സൗകര്യ രൂപകൽപനാ ജോലികളും അന്തിമമാക്കിയതായും അധികൃതർ അറിയിച്ചു. നിർമാണ കരാറുകാരിൽ നിന്നുള്ള ബിഡുകൾ നിലവിൽ പ്രോജക്ട് കൺസൾട്ടൻ്റിൻ്റെ അവലോകനത്തിലാണ്.400 കിടക്കകളുള്ള ഒരു ആശുപത്രിയും, ഭാവിയിൽ 800 കിടക്കകളാക്കി വികസിപ്പിക്കാനുള്ള പദ്ധതികളും ഈ മെഡിക്കൽ സിറ്റിയിൽ ഉണ്ടാകും. ഹൃദയ, ശ്വസന രോഗങ്ങൾ, ദഹന സംബന്ധമായ തകരാറുകൾ, യൂറോളജി, നെഫ്രോളജി, ഓർത്തോപീഡിക് കെയർ എന്നിവയ്ക്കായി അഞ്ച് പ്രത്യേക കേന്ദ്രങ്ങൾ ഈ സൗകര്യത്തിൽ ഉണ്ടായിരിക്കുമെന്നും അധികൃതർ വ്യക്തമാക്കി.മെഡിക്കൽ സേവനങ്ങൾക്ക് പുറമേ, ഔട്ട്പേഷ്യന്റ് ക്ലിനിക്കുകൾ, ദീർഘകാല പരിചരണ സൗകര്യങ്ങൾ, പുനരധിവാസ സേവനങ്ങൾ എന്നിവ ഈ സമുച്ചയത്തിൽ ഉണ്ടായിരിക്കും. ആശുപത്രിക്ക് ചുറ്റും റെസിഡൻഷ്യൽ, കൊമേഴ്‌സ്യൽ, വിനോദ മേഖലകൾ ഉൾപ്പെടെയുള്ള നോൺ – മെഡിക്കൽ അടിസ്ഥാന സൗകര്യങ്ങളും ഹരിത ഇടങ്ങളും നിർമിക്കും.ലോകോത്തര ആരോഗ്യ സംരക്ഷണം നൽകുന്നതിനു പുറമേ, വിദേശ ചികിത്സയെ ആശ്രയിക്കുന്നത് കുറയ്ക്കുകയും പ്രാദേശിക ഗവേഷണ പരിശീലന പരിപാടികൾ വർധിപ്പിക്കുകയും ചെയ്തുകൊണ്ട് കുവൈത്തിന്റെ മെഡിക്കൽ മേഖലയെ ശക്തിപ്പെടുത്തുക എന്ന ലക്ഷ്യത്തോടെയാണ് പദ്ധതി രൂപകൽപന ചെയ്തിരിക്കുന്നത്. ഇത് കുവൈത്തികൾ ഉൾപ്പെടെയുള്ളവർക്ക് പ്രൊഫഷണൽ, സാങ്കേതിക തൊഴിലവസരങ്ങൾ സൃഷ്ടിക്കുകയും കുവൈറ്റ് സർവകലാശാലയിലെ മെഡിക്കൽ വിദ്യാർഥികൾക്കുള്ള പരിശീലന കേന്ദ്രമായി പ്രവർത്തിക്കുകയും ചെയ്യും.കുവൈറ്റ് മെഡിക്കൽ സിറ്റിയുടെ വികസനം ഘട്ടം ഘട്ടമായി പുരോഗമിക്കുമെന്ന് അധികൃതർ അറിയിച്ചു. 2025 – 2026 സാമ്പത്തിക ബജറ്റിൽ പദ്ധതിയുടെ പ്രാഫമിക പ്രവർത്തനങ്ങൾക്കായി 50 ദശലക്ഷം ദിനാർ അനുവദിച്ചിട്ടുണ്ട്. 2025 ജൂലൈയിൽ ആശുപത്രിയുടെ ഡിസൈനുകൾ സമർപ്പിക്കാൻ കൺസൾട്ടിങ് സ്ഥാപനങ്ങളെ ക്ഷണിക്കും. തുടർന്ന് 2025 നവംബറിൽ വിജയിക്കുന്ന ബിഡ് തിരഞ്ഞെടുക്കുകയും 2025 ഡിസംബറിൽ കരാർ ഒപ്പിടുകയും ചെയ്യും.ആശുപത്രി രൂപകൽപനയും മെഡിക്കൽ ഉപകരണങ്ങളുടെ തിരഞ്ഞെടുപ്പും 2026 സെപ്റ്റംബറോടെ പൂർത്തിയാകുമെന്ന് പ്രതീക്ഷിക്കുന്നതായും പത്രം വ്യക്തമാക്കി. മെഡിക്കൽ സിറ്റിയുടെ നിർമാണം 2027 സെപ്റ്റംബറിൽ ആരംഭിക്കും. 2030 അവസാനത്തോടെ പദ്ധതി പൂർത്തിയാകുമെന്ന് പ്രതീക്ഷിക്കുന്നതായും അധികൃതരെ ഉദ്ധരിച്ച് പത്രം റിപ്പോർട്ട് ചെയ്തു.

കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/ElaG9HX6VACJt6K2QWAEKx