കുവൈറ്റില്‍ ഡ്രൈവിങ് ടെസ്റ്റ് പാസ്സാവുന്നവരില്‍ കൂടുതലും സ്ത്രീകള്‍; പ്രവാസികളില്‍ അധികപേരും തോല്‍ക്കുന്നു: കണക്കുകൾ ഇങ്ങനെ
കുവൈറ്റ് സിറ്റി: കുവൈറ്റില്‍ ഡ്രൈവിങ് ടെസ്റ്റുകള്‍ക്ക് ഹാജരാവുന്നവരില്‍ കൂടുതല്‍ സ്ത്രീകള്‍ വിജയിക്കുന്നതായി കണക്കുകള്‍. സ്വദേശികളെ അപേക്ഷിച്ച് പ്രവാസികളായ അപേക്ഷകരില്‍ വിജയനിരക്ക് കുറവാണെന്നും കണക്കുകള്‍ വ്യക്തമാക്കുന്നു. സെന്‍ട്രല്‍ അഡ്മിനിസ്ട്രേഷന്‍ ഓഫ് സ്റ്റാറ്റിസ്റ്റിക്സിന്റെ സമീപകാല കണക്കുകള്‍ പ്രകാരം കഴിഞ്ഞ വര്‍ഷം 25,015 സ്ത്രീകളാണ് കുവൈറ്റില്‍ ഡ്രൈവിങ് ലൈസന്‍സിന്റെ ഭാഗമായുള്ള പ്രായോഗിക പരീക്ഷയില്‍ പങ്കെടുത്തത്. ഇവരില്‍ 18,618 പേര്‍ വിജയിക്കുകയും 6,397 പേര്‍ പരാജയപ്പെടുകയും ചെയ്തു. 25.57 ശതമാനം പേര്‍ മാത്രമാണ് പരാജയപ്പെട്ടത്. തിയറി പരീക്ഷയില്‍, 20,060 സ്ത്രീകള്‍ പങ്കെടുത്തതില്‍ 19,178 പേര്‍ വിജയിക്കുകയും 882 പേര്‍ പരാജയപ്പെടുകയും ചെയ്തു. വെറും 4.4 ശതമാനം പേര്‍ മാത്രമാണ് തിയറിയില്‍ പരാജയപ്പെട്ടത്.
അതേസമയം, 116,320 പുരുഷന്മാര്‍ പ്രായോഗിക ഡ്രൈവിംഗ് ടെസ്റ്റില്‍ പങ്കെടുത്തതില്‍ 80,878 പേര്‍ വിജയിക്കുകയും 35,442 പേര്‍ പരാജയപ്പെടുകയും ചെയ്തു. ഇത് 30.46 ശതമാനമാണ് പരാജയ നിരക്ക് രേഖപ്പെടുത്തിയത്. തിയറി പരീക്ഷയില്‍, 93,701 പുരുഷന്മാര്‍ പങ്കെടുത്തതില്‍ 82,015 പേര്‍ വിജയിക്കുകയും 11,686 പേര്‍ പരാജയപ്പെടുകയും ചെയ്തു. ഇതിലെ പരാജയ നിരക്ക് 12 ശതമാനമാണ്. സ്ത്രീകളെ അപേക്ഷിച്ച് രണ്ട് ടെസ്റ്റുകളിലും പുരുഷന്‍മാരിലാണ് പരാജയ നിരക്ക് കൂടുതല്‍. തിയറി, പ്രാക്ടിക്കള്‍ പരീക്ഷകള്‍ രണ്ടും ഒന്നിച്ചെടുത്താല്‍ 37,796 സ്ത്രീകള്‍ വിജയിക്കുകയും 7,279 പേര്‍ പരാജയപ്പെടുകയും ചെയ്തപ്പോള്‍ പുരുഷന്‍മാരില്‍ 162,893 പേര്‍ വിജയിക്കുകയും 47,128 പേര്‍ പരാജയപ്പെടുകയും ചെയ്തു. പരാജയ നിരക്ക് സ്ത്രീകളില്‍ 16 ശതമാനവും പുരുഷന്‍മാരില്‍ 22.4 ശതമാനവുമാണ്.
അതേസമയം, ആകെ 109,918 പ്രവാസികള്‍ ഡ്രൈവിംഗ് ടെസ്റ്റില്‍ പങ്കെടുത്തതില്‍ 71,115 പേര്‍ വിജയിക്കുകയും 38,803 പേര്‍ പരാജയപ്പെടുകയും ചെയ്തു. അഥവാ ടെസ്റ്റില്‍ പങ്കെടുത്ത പ്രവാസികളില്‍ 35.31 പേരും പരാജയപ്പെട്ടു. എന്നാല്‍ 31,417 കുവൈറ്റ് പൗരന്മാര്‍ അപേക്ഷിച്ചപ്പോള്‍ അവരില്‍ 28,381 പേര്‍ വിജയിക്കുകയും 3,036 പേര്‍ പരാജയപ്പെടുകയും ചെയ്തു. 9.66 ശതമാനം സ്വദേശികള്‍ മാത്രമാണ് ടെസ്റ്റില്‍ പരാജയപ്പെട്ടത്. 2023ല്‍ 104,793 ഡ്രൈവിങ് ലൈസന്‍സുകളാണ് കുവൈറ്റ് ട്രാഫിക് ഡയരക്ടറേറ്റ് നല്‍കിയത്. ഫര്‍വാനിയ- 24,566, കുവൈറ്റ് സിറ്റി- 22,077, അഹമ്മദി- 21,227, ജഹ്റ- 14,779, ഹവല്ലി- 11,434, മുബാറക് അല്‍ കബീര്‍- 10,710 എന്നിങ്ങനെയാണ് അനുവദിച്ച ഡ്രൈവിങ് ലൈസന്‍സുകളുടെ ഗവര്‍ണറേറ്റ് തിരിച്ചുള്ള വിവരങ്ങള്‍.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/CphhwPjIyE122skAdI32Qg
Comments (0)